Baat bahut pahle ki hai. Us waqt main wardha me kaam karta tha. Pahle main ghum ghum kar kaam kiya karta tha. Matlab jaha kaam mil gaya kar liya. Waise mai gharon me rangai potai ka kaam karta tha. Ham sabhi kuchh ladke mil kar rangai potai ka kaam karte the.
Main bihar ka hoon. Par mere sath jo ladke kaam karte the. We sabhi bangal ke the. Main akela bihar ka tha. Ek baar ka baat hai. Mai wardha me kaam karne gaya tha. Mere gang me 6 ladke the. Panch bangali aur ek main bihari. Wardha me ek ghar me pochara karne ka kaam mila.
Waise aksar ye kaam milta rahta hai. Ghar ke andar aur bahar pochara karne ka kaam. Ghar ka size aur kitna rang lagega. Iska andaza pata kar ham sabhi theka le lete the. Achchhi tarah se finishing kar ke dene par apna paisa le lete the. Isi tarah ek ghar me pochara karne ka kaam mila. Kaam sahi se chal raha tha. Ham 6 ladke apne kaam me lage hue the.
Ek ladka kuchh uchai par kaam kar raha tha. Nahi pata kaise wo jis sidhi par chahar kar kaam kar raha tha. Achanak se wo sidhi ghasak gaya. Jis karan sidha unbalance ho kar gir gaya. Sidhi ke upar wo ladka bhi kaam kar raha tha. Sidhi ke sath wo bhi niche pakke par aa kar gir gaya. Wo sidha sar ke bal se niche gira jis karan use bahut hi gambhir chot lag gaya.
Uske girte hi bahut afra tafri mach gaya. Ham sabhi wahi par kaam kar rahe the. Sabhi turant uske samne pahuche. Ghar ka malik bhi aa gaya. Turant use utha kar sadar hospital le gaye. Waha par use admit karaye aur uska ilaz chalu ho gaya. Jyada nahi kuchh hi dino tak lagbhar char din hi ilaz chal paya. Us ladke ke mathe par gambhir chot laga tha. Waise doctor bhi bol chuka tha ki jyada din tak zinda nahi rah payega.
Char din me hi wo ladka mar gaya. Uske marne ke baad to mano ham sabhi ke upar aafat hi toot gaya. Jo ladka hamare sath rahta tha. Achanak se mar jaye to bahut kharab lagata hai. Uske marne ke baad us ladke ke ghar walon ko khabar karna pada. Unhe sabhi kuchh bata diye. Ghar par bhi rona dhona shuru ho gaya. Ab hamare samne ek musibat tha ki uski laash ko uske ghar tak kaise le kar jaya jaye.
Jis makan ka rangai ka kaam kar rahe the. Usne bhi hamari bahut madad ki. Usne apne kharche se ambulance kiya. Us ledke ki laash ko ambulance se le kar uske ghar le jana tha. Laash ambulance me daal diya gaya. Ab sawal tha ki ambulance ke sath koun jayega. Uske ghar ke samne ke ladko ne to saaf mana kar diya ki main laash le kar nahi jaunga. Agar le kar gaya to nahi pata uske ghar ka mahoul kaisa hoga. Kahi we sabhi maar pit na karne lage. Koi laash ko le kar jana chah hi nahi raha tha. Mai unhe kitna manaya ki kuchh nahi hoga.
Par koi manane ke liye tayyar hi nahi the. Phir mai socha ki chalo mai hi laash ko le kar uske ghar chale jata hoon. Kisi bhi tarah uske laash ko uske ghar tak pahuchana hi padega. Mai tayyar ho gaya. Apne doston se bola ki tum sabhi yahi raho. Main iski laash ko le kar iske ghar jata hoon. Dead body ko ambulance me rakha gaya. Mujhe bangal tak jana tha. Lagbhag barah ghante se bhi jyada ka safar tha. Sham ke samay dead body ko ambulance me rakha gaya.
Safar raat bhar ka tha. Us ambulance me teen log sawar hue. Ek mai aur ek ambulance ka driver aur ek hospital ka staff tha. Sham ke samay ham hospital se nikle. Raat bhar ka safar. Jana bahut dur tha. Bich me dead body aur ham dono uske agal bagal baithe the. Ambulance chalne laga. Jab kuchh dur tak ambulance gaya to mere sath jo aadmi baitha tha. Use nind aane laga. Wo baithe baithe hi so gaya. Mai ek took se dead body ke taraf dekh raha tha. Par jaise hi kuchh dur aur aage ambulance badha hi tha ki dead body ka ek haat kafan se bahar nikal gaya. Mai us hath ko phir se kafan ke andar rakha aur apne jagah pe baith gaya.
Par thoda hi der me dusra hath bhi bahar nikal gaya. Mujhe aisa laga ki uske haath me jaan aa chuki hai. Hathon ki halchal saaf pata chal raha tha. Par khud par yakin kar pana bahut muskil tha. Main hath ko phir se andar rakh kar baith gaya. Par mere dimag me ek sawal baith gaya. Wo ye tha ki is ladke ki haath khud ba khud bahar kaise nikal ja raha hai. Is laash ke ungliyon me ye halchal kaisa hai.
Ye zinda to nahi hai. Par aisa ho bhi nahi sakta hai. Kyu ki is dead body ka post mortem hua hai. Pure sharir me chira ka nishan hai. Par us laash ki harkat mujhe sochne par majbur kar raha tha. Mere sath jo ambulance ka aadmi tha. Wo to gahri nind me so raha tha. Raat bhi jyada ho chuki thi. Par mujhe nind kaha aane wala tha. Mai to ek took dead body ke taraf dekh raha tha. Raat ke takriban barah baj rahe the.
Achanak se maine dekha ki dead body apne aap hi uth kar baith gaya. Jaise hi dead body uth kar baitha. Mera to hoss hi udd gaya. Kahi ye mara hua aadmi phir se zinda to nahi ho gaya. Mujhe itna darr laga ki main bahut hi jor se chilla diya. Jaise hi mai chillaya. Mere samne baitha hua ambulance ka aadmi jag gaya. Usne bhi dekha ki dead body apne jagah par baitha hua hai.
Usne dead body ko phir se sula diya aur mujhe bola ki aisa hota rahta hai. Maine bhi bahut baar aisa dekha hai. Tum naya ho tumhe pata nahi hai. Par mai hamesha dead body le kar ek jagah se dusre jagah aata jata hoon. Mujhe to ab dead body ke sath rahne ka aadat ho gaya hai. Par mujhe is chij ke bare me pata nahi tha. Main to bahut dara hua tha. Raat ke samay ambulance ek dhabe ke paas ja kar ruka. Ham sbhi waha par khana khaye.
Ambulance ka driver aur uske sath jo aadmi tha. Wo mujh se bola ki tum to bahut darr gaye ho. Chalo tumhara darr khatm karta hu. Usne dhabe me ek daru ke botal ka order diya aur bola ki chalo ise pite hai. Ham teeno mil kar daru piye. Mujhe nasha chahar gaya. Uske baad phir se ambulance shuru hua. Raat me mujhe bahut gahri nind aa gai. Subah 10 baje ke karib me main apne manjil par pahuch gaya. Uske ghar walon ka to ro ro kar bahut bura haal tha. Main uske ghar walon ko dead body de kar wapas ambulance se wardha aa gaya.
Par rasta bhar sochta raha ki jis insaan ke sath itna dosti tha. Jiske zinda rahte koi darr nahi tha. Par jab wo marr gaya to mujhe us se hi darr lagne laga. Wo din aaj bhi mujhe achchhi tarah se yaad hain. Ab main ghar ke rangai ka kaam hi chhod chuka hoon. Apne ghar pe rahta hu aur raaj mistri ka kaam karta hoon.
